Thursday, December 30, 2010

နာမည်များရဲ့သိက္ခာ


နာမည်တစ်လုံးရဖို့
ဘယ်သူမှ ကိုယ့်စာမျက်နှာ ကိုယ်မကျော်ချင်ကြဘူး
ဒါပေမယ့် 
စာမျက်နှာတွေ ကျော်ခဲ့ကြပြီ။

နာမည်တစ်လုံးရဖို့
မတရားမှုအတွက်
ဘယ်သူမှ သူများမျက်နှာကြည့်ဖို့မလိုဘူး
တရားမျှတမှုကို ချစ်ခြင်းမေတ္တာနဲ့။

နာမည်တစ်လုံးရဖို့
ဘယ်သူက ကိုယ့်နာမည်ကို စတေးခံနိုင်သလဲ
ဒါပေမယ့် စတေးလိုက်ကြပြီ
ကောင်းခြင်း ဆိုးခြင်းတွေနဲ့။

အရေးကြီးဆုံးက...................
ကိုယ့်ကို အများချစ်စေတာထက်
ကိုယ်က အများကိုချစ်တာက
ဘယ်ဟာက ဘယ်လောက်တန်ဖိုးရှိမှာလဲ
ကဲ................
ကိုယ့်သိက္ခာ ကိုယ့်သမိုင်းကို
နာမည်တစ်လုံး ကမ္ဗည်းထိုးကြမယ်။


Saturday, November 27, 2010

ရင်ဘတ်ထဲက ပေးစာ

သူငယ်ချင်း

သတိရသကွာ။ မင်းတို့အမြင်မှာ ငါ ရေနည်းငါး ဖြစ်နေပြီလားကွာ။ ငါ့မှာရှေ့တက်ဖို့က အခြေအနေ မရှိဘူးလေ။ ငါးတစ်ကောင်လိုပေါ့။ ရှေ့အထက်မှာ ရေနည်းနေရင် အထက်ကို ဆက်တက်လိုက်ရင် အဆင်းမှာ အဲ့ဒီငါးအတွက် ဘယ်လိုဖြစ်မလဲ မင်းစဉ်းစားကြည့်။ ငါဟာ အဲ့ဒီအနေအထားပါ။ အဆုတ်အဆင်း တွေထက် ရပ်နေဖို့ ကြိုးစားနေရတာနဲ့ ငါ အချိန်တွေကို ဖြုန်းတီးနေတာမဟုတ်ဘူး သူငယ်ချင်း။ မင်းမြင်စေချင်တဲ့ ငါတို့သူငယ်ချင်းတွေ မင်းပြောနေကျ တန်းတူအဆင့်အတန်းဆိုတာ ငါနားလည်တာပေါ့ သူငယ်ချင်းရာ။ မင်းကတော့ ဆက်တိုးသင့်တယ်လို့ မင်းယူဆမှာပေါ့။ မင်းလျှောက်ရမယ့်လမ်းကို ကြိုတင်ရွေးထားတာဆိုတော့ မင်းအတွက် ဟုတ်ကောင်းဟုတ်မယ် သူငယ်ချင်း။ ငါ့အတွက်ကတော့ ရှေ့တစ်လှမ်းတိုးဖို့ နောက်တစ်လှမ်း နှစ်လှမ်းဆုတ်ခဲ့ရတာတွေ မင်းလည်းသိမှာပါ။ တစ်ကယ်တော့ ဘဝဆိုတာ မင်းပြောသလို သစ်နေဖို့ကို ဆက်တိုးဖို့ပဲ အရေးကြီးတာပါဆိုတာ ငါမမေ့ပါဘူး။ ဒီလောက်နဲ့ရပ်နေဖို့ဆိုတာ ဘယ်သူမှ ကိုယ့်တံခါးကို ကိုယ်ပိတ်ထားမှာမဟုတ်ဘူးဆိုတာ သူသူကိုယ်ကို နားလည်ကြမှာပါ။ အကြောင်းကြောင်းကြောင့်လို့ ကံကြမ္မာကို အလိုလို လက်ညှိုးထိုးကြတာ ဘယ်သူ့အပြစ်လဲကွာ။ အချိန်အခါနဲ့ အခြေအနေကို စောင့်ကြည့်ရမလိုပါပဲ ဟုတ်ဘူးလား။ တစ်ခါတစ်ရံ မလှုပ်သာ မလှည့်သာဘဝအနေအထားမျိုးမှာ။ ငါတို့သူငယ်ချင်းတစ်ယောက် ပြောသလိုပေါ့ စောင့်ကြည့်ရုံ သက်သက်နဲ့တော့ ဒါက ဒီလိုရှိတယ်လို့ လုပ်မပြစ်ပါနဲ့တဲ့။ ဟုတ်တယ်နော် ငါတို့လည်း အဲ့ဒီလိုမျိုးတွေ ရှိခဲ့ဖူးတယ်။ ဒါကလည်း ထားခဲ့ရုံသက်သက်နဲ့တော့ အမှတ်တရမဖြစ်ခဲ့ကြပါဘူး။ အချင်းချင်း ပွင့်ပွင့် လင်းလင်းရှိဖိုဆိုတာ တစ်ကယ်လိုအပ်တဲ့ ကျင့်ထုံးတစ်နည်းပဲ။ မင်းကို ငါတို့က ခေတ်ရှေ့ပြေးလို့ သတ်မှတ်ထားတာလေ။ ကိုယ်တို့အချင်းချင်း စကားပြောလိုက်ရင် ငါတို့ ဘယ်အပေါက်က လိုက်ရ မလဲဆိုတာ ဖြစ်နေရတာ။ စာကို မင်းက တအားဖတ်တာကိုး။ မင်းရဲ့ကျေးဇူးနဲ့ ငါတို့တွေ စာတွေ ဖတ်ဖြစ်တယ်။ စာဖတ်ဖို့ ဝါသနာတွေပါလာတယ်။ စာတွေဖတ်ပြီး ရှေ့ဆက်အတွေးအခေါ်တွေကို ဆက်လက်ဆွေးနွေးကြတော့ မင်းရဲ့မျက်နှာ ပြုံးလို့။ မင်းကတွေးမှာပေါ့ ငါတို့တစ်တွေ ရှေ့ဆက်လုပ်ချင်တဲ့ အလုပ်တွေ အတွေးအခေါ်ညီညီနဲ့ လုပ်ကိုင်လို့ရပြီဆိုတာကိုပါ။ မင်းပြောနေကျ ငါတို့ အများအတွက် ဘာလုပ်ပေးနိုင်မလဲဆိုတာ ခုတော့ ငါမှာလည်း ရှိနေပါပြီ သူငယ်ချင်း။ မင်း ဝမ်းသာတော့ မင်းရဲ့မျက်လုံးမှေးမှေးလေးနဲ့ ပြုံးနေကျ အပြုံးလေးနဲ့။ သတိရတယ်ဆိုတာ လက်တို့ပြီး ပြောရမှာ မဟုတ်ပါဘူး။ ဟုတ်တယ်နော် မင်းနဲ့ငါကြား ဖလင်တစ်ကွက်စာလောက် သတိရနေကြရင် မင်းမက်နေ တဲ့အိပ်မက်တွေ ငါမက်နေတာပါပဲ။ ဒါပဲကွာ ဆက်တွေးကြသေးတာပေါ့။ 


မင်းရဲ့
အဝေးက နီးနေတဲ့ 
သူငယ်ချင်း

Wednesday, November 17, 2010

အဖြူရောင်နံနက်ခင်းနဲ့ အမည်းရောင်ညနေခင်းများ


တိမ်မည်းတွေအုပ်မိုးပြီး
ခိုးကြောင်ခိုးဝှက်မျက်နှာထားနဲ့
ငါ့ကို လာလာ မကြည့်နဲ့။

ကိုယ့်အတွေးအခေါ် ကိုယ့်အပြောအဆိုဟာ
လွတ်လပ်မှုကင်းရှင်းရဲ့လားလို့
ပြန်ဆန်းစစ်ရတာ ငါ့မှာအမော။

ဘယ်အတိုင်းအတာထိ
လှနေမှာလဲလို့မေးနေတာကိုပဲ
လှနေတာကိုက လှနေတာပါ။

ကြည့်တတ်သူတွေအတွက်ကတော့
ဘယ်သူ ဘာဆိုတာ
အဓိပ္ပါယ်ဖွင့်ဆိုချက်တွေ 
ပြောနေဖို့မလိုအပ်တော့ဘူး။

ဘုရားဇာတ်တော်ထဲမှာ တွေ့သလို
ကိုယ့်အကျိုးအတွက်
ဘယ်သူက ဘယ်လောက်ထိ ရက်စက်မှာလဲ
အများအကျိုးအတွက်
ဘယ်သူက ဘယ်လောက်ထိ သည်းခံမှာလဲ
ကဲ.......... မေးကြည့်မယ်
ငါတို့ဟာ
သူတော်ကောင်းလား?
လူယုတ်မာလား?


မှတ်ချက်။           ။ သူတော်ကောင်းယောင်ဆောင်ပြီး လူယုတ်မာတော့ မလုပ်မိပါစေနဲ့။

Saturday, November 13, 2010

နိုဝင်ဘာ(၁၃)


အလွတ်ရထားတဲ့စာတွေ
အလွတ်ပြန်ဆိုနေမိတယ်
“ကမ္ဘာမြေကြီး ငြိမ်းချမ်းပါစေ”

ရလာဒ်တွေအဖြေပျောက်ဆုံးချိန်
အလင်းသဲ့သဲ့ တန်ဆောင်မုန်း
ငါ မျှော်လင့်မိတာ ငါ့အမှားလား။

ပြိုလာမယ့် မိုးကို 
ငါ မတားချင်ပါဘူး
ထဲထဲဝင်ဝင်ရွဲဆိုနေမယ့်နေ့ရက်တွေ
ခုရောက်လာခဲ့ပြီ
နေ့သစ်တွေကြိုကြ။

ဘုရားအဟောရှိတယ်
သတိ ပိုတယ်မရှိတဲ့
သတိတွေ မမေ့ကြနဲ့
ပညာနဲ့ ကြပ်ကြပ် သတိ။

မျှော်ရင်းနဲ့ ပျော်ခဲ့တယ်
ခရီးအတိုင်းပေါ့
ဒီနေ့ နိုဝင်ဘာ (၁၃)
အရင်အတိုင်းပဲ
ရဲသထက် ရဲရင့်ပါစေ။

Sunday, October 24, 2010

ရေးသူနှင့်ဖတ်သူတို့၏အကွာအဝေး(၂)


လူတစ်ယောက်အတွက် ခေတ်နောက်ကျခြင်း မကျခြင်းဆိုတာ စာပေနဲ့ဂီတဟာ   လေးနဲ့မြှားလိုပဲ။ လေးဟာ စာပေ မြှားဟာ ဂီတပဲထင်မိတယ်။ လူတစ်ယောက်နဲ့ လက်ရှိရှင်သန်နေတဲ့ စာပေနဲ့ဂီတအကြောင်းကို စကားပြောကြည့်ရုံနဲ့ သူဘယ်လို ဘာလဲဆိုတာ တွေးကြည့်လို့ရပါတယ်။ စာပေနဲ့ဂီတကို ခေတ်နှင့်အညီ ဝေးကွာနေရင် လူတစ်ယောက်ရဲ့တွေးခေါ်မှုဟာ သီးခြားကျန်ရစ်ခဲ့မှာပါ။ စီးပွါးရေး လူမှုရေးဟာ လက်တွဲ ခေါ်လို့ရပေမယ့် စာပေနဲ့ဂီတကတော့ လက်တွဲခေါ်ဖို့ နဲနဲခက်ခဲလိမ့်မယ်ထင်တယ်။ စာဖတ်ခြင်းဟာ ပြောင်းလဲဖတ်ဖို့ ရွေးချယ်ဖတ်ဖို့ဆိုတာ ကျေနပ်မှုလက်ခံစွမ်းအားထက်ဖို့ အရေးကြီးမယ်ထင်ပါတယ်။ ကျနော်နဲ့စာအတူဖတ်ခဲ့တဲ့သူငယ်ချင်းတစ်ယောက်ဟာ ခုထိ သိုင်းဝတ္ထုဖတ်နေတုန်းပဲ။ ပြောင်းလဲဖတ်ဖို့ ကျနော်ပြောကြည့်သေးတယ် သူ့ကျေနပ်မှုဟာ ရှေ့ဆက်ဖတ်ဖို့ခက်နေသလိုမျိုး။ ဘာပဲဖြစ်ဖြစ် ခေတ်ရဲ့စာပေ ဂီတနဲ့ဝေးနေသေးရင်တော့ ခေတ်တစ်ခေတ်ရဲ့အကန့်တွေကြားမှာ ခေတ်နဲ့ဝေးရင်း ဝေးရင်းနဲ့ ငါတို့တုန်း ဘယ်လိုဆိုတဲ့စကားသံတွေ တထောင့်တနေရာက အမှတ်မထင်ကြားနေရအုံးမှာပါပဲ။

ခုလည်း ကျနော် တွေ့တဲ့စာ ဖတ်မိတော့ ရှေးသူတို့ သူတို့နဲ့ခေတ်ပြိုင်တွေက အနေဝေးလေတော့ တစ်ယောက်စကားနဲ့ နားအကြားကို အတည်ယူဖို့ မေတ္တာစာနဲ့အတူ မေးခွန်းတွေမေးခဲ့တာဖတ်ရတယ်။ ခုဖေါ်ပြမယ့်စာက မေတ္တာပြန်စာပါ။ စာပြန်သူက တသက်လုံးရဟန်းမပြုဘဲ ရှင်သာမဏေ(သို့မဟုတ်) ကိုရင်ဘဝနဲ့နေသွားပြီး ပုစ္ဆာမေးခွန်းပေါင်း(၁၁၁၇)ခုပါဝင်တဲ့ နာမည်ကျော် စွယ်စုံကျော်ထင်ကျမ်းကို ပြုစု သွားတဲ့ ကြည့်ကန်ရှင်ကြီးပါ။ ပြန်စာက.............

ရူပါရမံ စိတ္တမိဒံ ဌပေတွာ အစဖြာလျက် ကျမ်းလာနှင့်အညီ ပကတိသော လူသာမညတ္ထတို့ကို စော်စော်ကားကားမဆိုထားနှင့် နတ်များပင် တသက်ပတ်လုံး ကြည့်သော်လည်း မြင်စော်မနံသာ ဗြဟ္မာမင်းတို့၏ ဒိဗ္ဗစက္ခုဖြင့် ရှုသော်လည်း လေးလုံးမကွဲ ဒေဝါတိဒေဝါ ဖြစ်တော်မူသော မြတ်စွာဘုရား သခင်၏ သဗ္ဗညုတဉာဏ်စက္ခုဖြင့်သာ မြင်စကောင်းသော အလွန်သိမ်မွေ့စွာသော ပရမတ္ထအစု အကုသိုလ်တရားတည်းဟူသော ရန်သူတို့ကို မပျူကွာဝေး ပြေးလွင့်စေခြင်းငှါ မဟာကုသလ ဉာဏသမ္ပယုတ်ဝီထိနှင့် သတိကို မြို့ရိုးမြို့တောင် ပြုစေကာ ပညာတည်းဟူသော လက်နက်ဖြင့် တိုက်လွင့်ဖြိုနှင် အောင်မြင်သည်ဖြစ်စေသောဟူ၍၎င်း ပါတိမောက္ခံ ဝိသောဓေန္တော အပ္ပေဝ ဇီဝိတံ ဇဟေ။ နက်လေးဂါထာ လာသည်နှင့်အညီ သီလသံဝရဘိဇ္ဇနန ဖြစ်အံ့သောအရာဝယ် လေးသွယ်သော ပါတိမောက္ခမြို့ကို မြတ်နိုးမပျက် နှစ်သက်တော်မူသော ဇောစေတနာအရှိန်နှင့် ဇီဝိတိနြေ္ဒကိုမငဲ့ကွက် သက်စွန့်ကျင့်ဆောင်တော်မူသည်သာ ဖြစ်ပါစေသောဟူ၍၎င်း စာမရီဝါလဓိ ဟူသောပါဌ်နှင့်အညီ ဇာ(မြီ)မည်သောသားသည် မွေးဖျားတပင် ခြုံတွင်ငြိချေက မထ မသွားရက် လွန်စုံမက်၍ သက်စွန့်သည့်ပမာ ဇာ(မြီ)ဝါ ပရိတ်ကို ယိုဖိတ်မည့်အချက်ကိုလည်း စုံမက်တော်မူသဖြင့် 
သက်စွန့် ကြဉ်းဆောင်တော်မူနိုင်သည် ဖြစ်ပါစေဟူ၍လည်းကောင်း 
ဆုပဋ္ဌနာ မေတ္တာမပျက် ဆက်လေ့ရှိပါသော 
ဧရာဝတီ သီတာမြစ်ဆုံ ကမ်းခုံနောက်ပါး ငါးရတွင်း ငါးပြန်ခန့်လောက် အနောက်ဘက်တိုက်ကြီးအတွင်း လင်းကတောဆယ်ရွာဝင် ရေယဉ်ချောင်းဆန် ရွာကြည့်ကန်က နန္ဒဓဇ 
ပဋိလောမ သိန္နေဟဝါစာ မေတ္တာစကား ပြန်ကြား လျှောက်လိုက်ပါသည် 
ပါရမီတိံသ ဇိနဆုယူ ဖြည့်တော်မူလေ့ရှိပါသော အရိယာဝံသ အာဒိစ္စရံသီ နောင်တော်သူမြတ်။

ညီတော်တို့မှာ ရတနတ္တယ နုဘာဝတွင် နောက်ကမေတ္တာ ပတ္ထနာကြောင့် မနှောင့်ဘေးဘျမ်း ငြိမ်းချမ်းသင့်စွာ သာသနာကို ယထာသတ္တိ စွမ်းရှိသမျှ ဖြည့်ပေးရသည် 
အကြည်တော်သူမြတ်မှာလည်း ဈေးနာစုံလင် စက်လေးအင်နှင့် အံ့လျှင်မပြီး ရပ်ကြီးရွာကိုယ့်ရပ်ထံ လက်ဝဲလက်ယာ သင်္ဃာတော်မြတ်တို့နှင့်တကွ သီလတည်းဟူသော ကနက်ထီးဖြူကို 
လူလူဆောင်းမိုးကာ ဖာသုဝိဟာရဖြစ်သဖြင့် သုံးဆင့်သောသာသနာတော်မြတ် ထွန်းလင်းအောင် ဖြည့်ဆောင်တော်မူရကြောင်း ကောင်းမြတ်သောမင်္ဂလာစကားကို ကြားရပေ၍လည်း 
တကြိမ်မှုတ်ရလျှင် လေးလမှ အသံစဲသော ဝိဇယုတ္တရ သိကြားခရုသင်းသံကို နာခံရဘိသကဲ့သို့၎င်း တစ်ဆဲ့နှစ်ယူဇနာ ကျယ်လှစွာသော ဗာရာဏသီ ပြည်လုံးချဉ်းအောင် 
တသင်းသင်း တကြိုင်ကြိုင် တလှိုင်လှိုင် တပျံ့ပျံ့ တနံ့နံ့ တဧးဧး မွှေးကြူစေနိုင်သော ကက္ကရုမဉ္ဖူသကနတ်ပန်းကို နမ်းရဘိသကဲ့သို့၎င်း 
တကြိမ်တလီမျှ သုံးဆောင်ရလျှင် ကာလဓွန့်ရှည်စွါ ဆာလောက်မွတ်သိပ်ခြင်း ကင်းငြိမ်းစေနိုင်သော နတ်သုဓါ ဘုတ်သြဇာကို လျှာ၌တင်ရဘိသကဲ့သို့၎င်း 
သောမနဿတဒါရုံ ကြိုက်ကြုံရွှင်လန်း ဝမ်းမြောက်ပါသည်။

ထူးလီလျှောက်ရန်မှာ။            ။ 
ယသ္မိံ မနော နိဝိသတိ၊ စိတ္တဉ္စာပိ ပသီဒတိ၊ 
အဒိဋ္ဌပုဗ္ဗကေပေါသေကာမံ တသ္မိမ္ပိ ဝိဿသေတိ။ 
မိန့်ရှိတော်မူသော ဒေသနာတော်ဝယ် 
တကြိမ်တခါမျှ မမြင်ရဘူးသည်ဖြစ်စေကာမူ အကြင်သူ၌ နှစ်ခြိုက်သောစိတ်ဝင်၍ ကြည်လင်သောစေတနာရောက်က စိတ်ရှိတိုင်းအကျွမ်းဝင်သည်သာ အဓိပ္ပါယ်လာသကဲ့သို့ သဟာယကြည်တော်မူလျက် အထူးထူးသောကျမ်းဂန်နှင့်ညှိ၍ သိပင်သိသော်လည်း မသိသကဲ့သို့ ကြို့ငဲ့တော်မူသော နိဝါတမင်္ဂလာနှင့် ပုစ္ဆာစီရေး၍ အမေးတော်ရှိသည်မှာ 
ဗာလလူ မာနလူကိုကြဉ်
ပဏ္ဍိသူ ဥာဏ်ရှိသူကိုယှဉ်
ချဉ်းလာညာစားတို့ကိုဖိ
ပညာပွားခြင်းအသွားညှိ
ရှိပြီးဖြစ်သော်ထပ်၍ပေး 
သိပြီးဖြစ်သော်လည်းထပ်၍မေး 
ပေးကမ်းနိုင်က ရန်ရှားသည် 
မေးမြန်းနိုင်က ဥာဏ်ပွါးသည် 
မျောက်သားမို့ စပ်ရအောင်မေးလေသည် 
နောက်သားတို့မှတ်ရအောင်ပေးလေသည် ဆိုဘိသကဲ့သို့ 
ပျားနှယ်ပြားထုတ်ရှာဖွေ၍ ငါးဆယ့်ငါးပုစ္ဆာတွေနှင့် ဖြေနိုင်လျှင်ဖြေကြလေ 
နေပိုင်လျှင်နေကြရော့ ဆိုလသေးပမာ မလာဖြစ်သာ နေ့ရွေးလျက် 
ဒယမေတ္တာရှေ့ပြေး၍ မေးတော်မူပေသောကြောင့် 
အစိန္တိမ္ပိ ဘဝတိ ဗောဓိသတ္တော စိန္တာမယာဟူသော ဒေသနာတော်မြတ်အထွက်နှင့် 
ဆက်ဆက်ဆံဆံ ပန်းရှင်မှန်သဖြင့် မကြံပဲနှင့် စော်ကဲမင်းဖြစ်သည် 
အလောင်းမင်းကို ဖုတ်သွင်းရထားဆိုက်သည် ဆိုဘိသကဲ့သို့အရေးတွင်
မဆေးချင်က စင်နှင့်သည်
မပြေးခင်းက လျင်နှင့်သည်
မရေးခင်က ထင်နှင့်သည်
မပေးခင်က ခင်နှင့်သည်
မဝေးခင်က နှင်နှင့်သည်
မလေးခင်က တင်နှင့်သည်
မအေးခင်က ကင်နှင့်သည်
မမွှေးခင်က ဆင်နှင့်သည်
မနှေးခင်က ယှဉ်နှင့်သည်
မလွေးခင်က ဝင်နှင့်သည်
မသွေးခင်က တင်နှင့်သည်
မနွှေးခင်က နွှင်နှင့်သည်
မဆွေးခင်က လွင်နှင့်သည်
မမွေးခင်က သင်နှင့်သည်
မမေးခင်က ပြင်နှင့်သည်
မချေးခင်က ခြင်နှင့်သည်
မထွေးခင်က သင်နှင့်သည်
မတွေးခင်က မြင်နှင့်သည်
မသုံးခင်က ကုန်နှင့်သည် ဟူသော
သူတော်ကောင်းတို့ထုံးလည်း တွက်ကျုံးဝင်ပြန်သောကြောင့် 
 ကြံတိုင်းလည်းမပြီး 
တီးတိုင်းလည်း မမည် 
တည်တိုင်းလည်း မနေ 
စေတိုင်းလည်း မရောက် 
ပေါက်တိုင်းလည်း မရှင်
ရွှင်ကြည်လျက် လမ်းသာသည် 
ကြင်ပါလျက် ကျွမ်းသာသည်
မြင်ပါလျက် စမ်းသာသည် 
ခင်ပါလျက် ခမ်းသာသည်
မင်ပါလျက် လှမ်းသာသည် 
မေးချင်က မြန်းသာသည်
ပေးချင်က ကမ်းသာသည် 
ရောက်ချင်က လာသာသည်
လာချင်က လမ်းသာသည် 
လမ်းသာက ခန့်သင့်သည်
ခန့်သင့်မှ ခွင့်လျော်သည် 
ခွင့်လျော်မှ စိုးပိုင်သည်
စိုးပိုင်က မူဆိုင်သည် 
ဆိုင်ချင်က ပိုင်သာသည်
ကြိုင်ချင်က လှိုင်လာသည် လောကနိဿရည်း ထုံးနည်းနယ ကမ္ကာ့ကျက်သရေ ဥပဒေကဲ့သို့ ကြံလေတိုင်းပြီးရမည် ဧကန်တွင် မကြံတကြံနှင့်ပင်ပြီးတော့သည် အရေးဖြစ်၍ 
မေးတိုင်းကြိုက်ရမည် 
ဖြေတိုင်းလိုက်ရမည် 
ပေးတိုင်းပိုက်ရမည် 
လက်တွင်လှော်ကာ ရွှေချခြေတော်တင် သမ္မာစစ်လှခက်ရင် ဖော်ထားဖြေမှ မြေပေါ်တွင် ဥာဏ်မြန်ဖြစ်သည် အရေးထွက်လျှင် စေထိုက်သည် 
အမေးခက်လျှင် ဖြေလိုက်မည် 
အမေးအဖြေမြောက် မေတ္တာရောက်က သည်မှာမဟူ 
အာဃလူ သဲ့လူ အိုဘဲ့လူ ကြောက်ဖွယ်လူဟူသော သူဟောင်းတို့လက်စ 
လောကဥပမည်း ကမ္ပည်းသမိုင်း မော်ကွန်းနိဒါန်း ထုံးတမ်းထုံးစံ လှော်ပြန်သည့်အနေနှင့် 
ရွှေကိုကားရွှေ ငွေကိုကားငွေ လှေကိုကားလှေ လူကိုပင်လူ ရှင်ကိုရှင် ဆင်ကိုဆင်
မြင်းကိုမြင်း မင်းကိုမင်းနှင့် အတော်အသင့်ဆိုဘိသကဲ့သို့ 
မြို့ကိုမြို့ချင်း ဆက်သွင်းဖြေဆိုမည့်အကြံနှင့် ပြန်လျှောက်လိုက်ဖူးသည် 
ရှေးဦးကင် တတ်စား မေတ္တာဂဟေဆော်တွင် ကိုယ်တော်မြတ်တို့မှာတမူကား 
သတင်းကိုစသော် လူလှလို့ထင်သည် 
ခံတွင်းဟသော် အူမကိုမြင်သည် 
မအေကိုမြင်သော် အသွင်ကိုမိသည် 
အဖြေကိုမြင်သော် အတင်ကိုမိသည် 
အမေရုပ်ရည်ကို စုံစုံလင်လင် အဖြေဟုတ်မည် 
ကုန်ကုန်စင်စင် သိမြင်ပြီးသော သဘောရှိသည်နှင့်ထပ်ဆင့်၍ 
အကြည်တော်မစေ နေတော်မူသောကြောင့် ဖြေလျှင်လည်း ဖြေလွယ်သည် နေလျှင်လည်းနေသာသည် စာကားတည်နှစ်ဖြာ နေသာအချက် ကိုယ်နှင့်ကွက်ကြံ စိတ်ကူးမြန်၍ ဥာဏ်ဣနြေ္ဒမကွန့် အဓွန့်ရှည်စွာ ပုစ္ဆာမဖြေနေတော်မူသည် သည်အချက်တွင် တခါပြရင်း သီတင်းသုံးဖော် ကိုယ်တော်မြတ်မှတပါး စပ်ကြားတွင် လျှောက်ပြန်လာသောကြောင့် ဖြေလိုက်ပြန်ပါသည်။

သို့ရာတွင် 
အရင်းစစ်သော် အမြစ်မြေကြီးက 
အခင်းဖြစ်သော် အမြစ်ဖွေမှ 
အမြစ်ကောက်၍ ကွယ်လေသည် 
အမြစ်လျှောက်၍ နွယ်လေသည်ဆိုဘိသကဲ့သို့ 
ကိုယ်တော်မြတ်နှင့်စပ်နွယ်ရင်း ပုစ္ဆာဖြစ်စေသည်လည်းတကြောင်း 
အမေးကျွဲကျောင်း အလောင်းဖြေသူ ရှေးလူတို့စကား ထင်ရှားရှိသည်ကို သိတော်မူသည် မှန်ဘိသည် ဆုံမိအောင် ပေးလေသည် 
ဂုဏ်ရှိအောင် မေးပေသည် ဆိုဘိသကဲ့သို့ 
မေတ္တာတော်ရှေ့ပြေးနှင့် မေးတော်မူပေသည် ကျေူးဇူးအထူးရှိပေ၏ဟု အောက်မေ့ပါကြောင်းကို သိတော်မူစေလိုသောကြောင့် အကြင်နာသူမလတ်အား အလျင်လာသူ မပြတ်သားဆိုဘိသကဲ့သို့ မေတ္တာမပျက် ဆက်ပါကြောင်းကို သိစေတော်မူလိုသည်လည်းတကြောင်း 
လှေတတ်ပါက မြစ်နားဆန် 
နေရပ်ရွာက မေတ္တာခံဆိုဘိသကဲ့သို့ 
ပို့တော်မူသောမေတ္တာတော်ကို မပြတ်နိယံ ခံယူလိုပါသည်လည်းတကြောင်း 
လက်ဖျားခါလှုပ် လျှာကိုထုတ်၍ အဟုတ်သခေါ ဖြစ်လိမ့်မည်ဆိုဘိသကဲ့သို့  
စီရင်လိုက်သော ပုစ္ဆာစကားမှာလည်း 
လျှာဖျားလှုပ်၍ ခွေမတတ် 
လက်ဖျားကိုလှုပ်လျှင် ကြွေမတတ် 
အလွန်ကောင်းမြတ် ဤအရပ်ထက်ဝန်းကျင် ရှင်လူရဟန်းပင် ဆန်းကြယ်ပြေပြစ် အနှစ်သာရနှင့် ပြည့်စုံပေ၏ဟု ကြည့်ရှုတော်မူ ပြု၍ထားပါကြောင်း တပည့်သူငယ်တို့ကိုလည်း ထိုတရားထိုပုစ္ဆာကို 
ဝါစုဂ္ဂဟ လျှာဖျားရွအောင် ရရဆောင်ရွက် လေ့လာပါရစေကြောင်း 
သို့အကြောင်းကြောင့် အဆစ်ဆစ် သနစ်သနာ အဖြေစာနှင့် ပျူငှါမပြား မုသားမပါ မာယာမထုတ် ဝေဝုစ်မသွယ် ပရိယာယ်မသွတ် လောကဝတ် ပလာ ဟုတ်တိုင်းသာလျှင် 
မေတ္တာဆက် မေတ္တာခံ အတန်တန်မင်္ဂလာရိပ်နှင့် အဘိက္ကန္တဣဋ္ဌ အဒေါသ ပိယဒယာ သိန္နေဟာ 
မေ မမ ဂါရဝါ မေတ္တာစကား ပြန်ကြားလိုက်ပါသည် အကြည်တော် သူမြတ်ဘုရား။
 

Wednesday, October 13, 2010

ရေးသူနှင့် ဖတ်သူတို့၏ အကွာအဝေး(၁၁၅၂ _ ၁၃၇၂)


ဒီလောက်ထိ ကပ်ထားတာတောင် ရင်ဘတ်ချင်းက မနီးချင်ဘူး။ အော် အိပ်မက်တွေလား..........။

အိပ်မက်တွေ ရာသီတစ်ခုစာ ဆုပ်မိထားချိန် နာမည်မကြားခင်ကတည်း ငါတို့ စိတ်ချင်းနီးနေကြတဲ့သူတွေပါ။ ဒီထက်လှပအောင် အရောင်တွေထပ်ချယ်ဖို့ မလိုတော့ဘူး။

ခေတ်တစ်ခေတ်မှာ ဘယ်သူ ဘာဆိုတာ တံခွန်လွှင့်စရာမလိုဘူး။ ပြောရရင် မီးတောက်ချင်း မီးကူးစရာ မလိုဘူး။ မျက်စိ နား ပညာထပ်တူကျခဲ့ရင် အားလုံးဟာ အနီးဆုံးလား အဝေးဆုံးလား။ သတိတရားရှိတဲ့ ပညာတတ်ခြင်းဟာ အောက်ခြေမှတ်ချက်လိုမယ်မထင်ပါဘူး။ 

ပါးစပ်ရဲ့အပြော ခြေထောက်ရဲ့အသွား နားရဲ့အကြား မျက်လုံးရဲ့အမြင်တွေနဲ့ တွေ့ကရာစာအုပ်တွေ ဖတ်ခဲ့မိတယ်။ ဖတ်ပြီးသားလည်း ဘယ်နှစ်ကြိမ်မှန်းမသိအောင် ထပ်ဖတ်မိတယ်။ စာငတ်သူရဲ့ တွေ့ကြုံရတဲ့ အနေအထားတွေပဲ ထင်ပါရဲ့။ ဒီလိုနဲ့ ကျနော် စာငတ်နေတဲ့ အငတ်ကြားမှာ ဌေးလွင်(ဆားလင်းကြီး)ရေးတဲ့ ကြည့်ကန်ရှင်ကြီး သူ့ရွာ သူ့ဘဝ သူ့စာပေ ကိုဖတ်လိုက်မိလေရဲ့။ အဖတ်နဲ့အငတ်ကြား တပ်မက်ခြင်းဟာ ရိုးရိုးသားသားပါပဲ ဝိရောဓိမဖြစ်ခဲ့လေဘူး။ 

စာအုပ်မှာပါတဲ့ စာတွေအားလုံးထက် နှစ်သက်မိတာက ၁၁၅၂ခု၊ သီတင်းကျွတ်လဆန်း၁၄ရက်နေ့ မုံရွေး ဆရာတော်က ကြည့်ကန်ရှင်ကြီးထံသို့ အဝေးရောက်မေတ္တာစာနဲ့ ပဉ္စပညာသပုစ္ဆာကိုပါ ပူးတွဲပို့လိုက်တာပါ။ 

ဖတ်ကြည့်ပါအုံး မေတ္တာစာက..................

အနုမတ္တေသု ဝဇ္ဇေသု ဘယဒဿာဝီ..ဟူသောပါဌ်နှင့်အညီ
ပကတိသော လူသာမညမတ္တတို့၏ မံသစက္ခုဖြင့် ရှု၍မြင်ကောင်းသည်မဟုတ်
ဆကာမာဝစရနတ်တို့၏ ဒိဗ္ဗစက္ခုဖြင့်သာ ရှု၍ မြင်စကောင်းသော ပရမာမြူနု ရေလုံးစုမျှလောက်သော
အကုသလ ပါပဓမ္မတို့ကို ပထဝီပံသု မေရုအဏ္ဏဝါ စကြဝဠာ တောင်ကဲ့သို့ထင်၍ 
လွင်ဗာဟိရ အပအစု ပြုနိုင်လေ့ ယှိပါစေတော့ဟု 
ဆုမြတ်ပဋ္ဌနာ မချာမလပ် ပြုတတ်လေ့ယှိပါသော
သလ္လာဝတီ သီတာမြစ်ကြီး၏ အရှေ့မျက်နှာ မုံရွေးရွာဇာတိ
ပဝတ္တိအခါ ဆားလင်းကြီးရွာက အရိယာဝံသ အာဒိစ္စရံသီ
ပီယဝါစာ မေတ္တာစကား ကြားရောက်လိုက်ပါသည်
သမ္မာသမ္ဗုဒ္ဓ ဘုရားဆုကို ပန်ယူတော်မူလေ့ရှိသော နန္ဒဓဇသူမြတ်။ 

ပုဗ္ဗေဝ သန္နိဝါသေန.....စသောပါဌ်နှင့်အညီ ရှေးရှေးသောဘုရား သဗ္ဗညုတတို့ထံ ဆုပန်ဆုယူ၍
အတူတကွ တိံသပါရမီကို စိတ်ညီစိတ်မျှ ဖြည့်ကြဘူးသည်နှင့် လျော်ညီစွာ
ယခုအခါ တခါတကြိမ်မျှ ညီတော်မျက်နှာပြင်ကို မမြင်မတွေ့ရဘူးသော်လည်း
၁၁၄၈ခုနှစ်တွင် ညီတော်မြတ်တို့ ရပ်ကြီးရွာနေ မောင်ကလျာဏတို့တွင် မွှေးလှစွာသောသတင်းကို
လေညှင်းယူ၍ ကျူလှာကြိုင်လှာသည်ဖြစ်၍ တွေ့မြင်ချင်သော နှလုံးနှိုက်
ရစ်ထုံးမကွာ စေတနာအလွန်ယှိပါ၍ ရောက်လှာမည်ဟု ကြံပါသည်လည်း
“အစိန္တိတမ္ပိ ဘဝတိ၊ စိန္တိတမ္ပိ ဝိနဿတိ၊ န ဟိ စိန္တာ မယာ ဘောဂါ၊ ဣတ္ထိယာ ပုရိသဿဝါ”
ဒေသနာတော်မြတ်ပြိုင်၍ ဆိုင်မိသမြင့် ကြံတိုင်းလည်းမပြီး 
တီးတိုင်းလည်း မမည် တည်တိုင်းလည်း မနေ 
စေတိုင်းလည်း မရောက် ပေါက်တိုင်းလည်း မရှင်
ရွှင်ကြည်လျက် မလွမ်းသာ ကြင်ပါလျက် မကျွမ်းသာ
မြင်ပါလျက် မစမ်းသာ ခင်ပါလျက် မဖမ်းသာ
မင်ပါလျက် မလှမ်းသာ မေးချင်ပါ၏ မမြန်းသာ
ပေးချင်ပါ၏ မကမ်းသာ ရောက်ချင်ပါ၏ မလာသာ
လာချင်ပါ၏ လမ်းမသာ လမ်းသာပါ၏ ခန့်မသင့်
အခန့်သင့်၏ အခွင့်မလျော် ခွင့်လျော်ပါ၏ စိုးမပိုင်
စိုးပိုင်ပါ၏ ခွင့်မဆိုင် ဆိုင်ချင်ပါ၏ မပိုင်သာ
ကြိုင်ချင်ပါ၏ မလှိုင်သာ.....ဟူသော လောကလက်သုံး ထုံးသာဓက ကမ္ဘာ့တန်ဆာ ဥပမာကဲ့သို့ 
ကြံပါလျက် မပြီးသေး၍ ကြာနှေးယှိရချေသည်။

ထိုသို့ဖြစ်သော်လည်း ဟဒယေ ပီယံနာမ.....စသည်နှင့်အညီ သရဒအခါ  
 အာကာသကောင်းကင်မှ ပေါ်ထွန်းသောလဝန်းဗိမာန်သည်  ယူဇနာတသိန်းခြားရာ အရပ်နှိုက်တည်သော 
ကော်ကနုဒ ပဒုမ္မာကြာခေါင်းလောင်းတို့ကို ပွင့်နိုင်စေသည် ဆိုသကဲ့သို့ နေရပ်နေရာ ဝေးကွာသော်လည်း စေ့ဆော်လေးမြတ်အပ်သောသူသည် ဝေးလေသည် မမည်ရကား
ညီတော်မြတ် ပို့သသောမေတ္တာ မလ္လာယုကျွန်းအပြင်နှိုက် 
တပင်တည်းသော ဂေါသီတ စန္ဒနနံ့သာနှင့်တူသော ကျူလှသော သြဒိဿ
ဗြဟ္မဝိဟာ ဥပေက္ခာ မေတ္တာရေမြတ်ကြောင့် 
နှောက်ယှက်အပ်သော အမင်္ဂလာ အနိဋ္ဌာရုပ် ဒုက္ခဝေဒနာ ရောဂါအန္တရာယ်တို့ မကပ်ရောက်သဖြင့်
အဆင့်ဆင့်သော ပါရမီ သမ္ဘာရ သဗ္ဗညုတဉာဏ်၏ အဆောက်အဦး
သုံးဆူသော စရိယဓမ္မတို့ကို နေ့ယှိ ညမချာ ယထာသတ္တိ စွမ်းယှိသမျှ ဖြည့်ရပေ၏
ညီတော်မြတ်၏ သန္တာန်ဝယ် တွယ်ကပ်တတ်သော အန္တရာယ်တို့သည်
ပျောက်ကွယ်ကင်းလင်း သန့်ရှင်းစင်ကြယ်သည်နှင့်အညီ
ပါရမီအပေါင်းတို့သည် ကိုယ်စိတ်ရွှင်လန်းစွာ စွန့်စားတော်မူသမျှ ဖြစ်ရကြောင်းများကို ကြားသိချင်ပါသည်
နောက်နောင်အခါ လူကြုံလာတွင် စာပေသဝန် ပြန်ကြားလိုက်စေချင်သည့် အကြောင်းတို့ကို 
တသောင်းတိုင်သာ ဝေးရပ်ကွာက မေတ္တာစကား ကြားရောက်ပါသည် အကြည်တော်သူမြတ်။


(မူရင်းသတ်ပုံအတိုင်း)

Monday, October 11, 2010

ချစ်စရာပဋိပက္ခများ


နားလည်မှုဆိုတာ လွဲချင်ရင် ရှာကြံပြီးလွဲတာ။ 

လက်ဖဝါးနှစ်ခုစုံတီးလို့ “ဖြောင်း ဖြောင်း” ဆိုတာ ထွက်ပေမယ့် နားလည်မှုက အဲ့လိုထွက်မလာတတ်ဘူး။ နားလည်မှုဆိုတာ တစ်ဘက်သားကို နားလည်ပေးလိုက်တာ အဲ့ဒီလိုပါလားဆိုတာ ကိုယ့်ကိုယ်ကို သိခွင့်ရ လိုက်တဲ့သဘောပါ။ ကိုယ့်ဘက်က ဘယ်လောက်နားလည်မှုပေးပေး တစ်ခြားတဘက်က အနေအထားကို သိမထားဘူးဆိုရင် တစ်ခါတစ်ရံ စေတနာက ဝေဒနာတွေ အလိပ်လိုက် အလိပ်လိုက်ထပ်ကုန်ရော။ ဖြစ်စေချင်တာနဲ့ ဖြစ်ချင်တာပဲဆိုရင်တော့ မုန်တိုင်းဆိုတာ လေရှိမှ မဟုတ်ဘူးဆိုတာ အဲ့ဒီအချိန်မှာ နားလည်မိတယ်။ 

တစ်ဘက်သားရဲ့သဘောသဘာဝကို စောကြောနားလည်ခြင်းမရှိရင် သားအဖချင်းကို ဆန့်ကျင်ဘက် ဖြစ်ဖြစ်သွားတယ်။ ကျနော့်အဖေနဲ့ ကျနော့်ကြားမှာလည်း အဲ့ဒီလိုလေးတွေ ရှိခဲ့ဖူးတယ်။ ရှိနေသေးတယ်။ အဖေ့ဘက်က ကြည့်တော့လည်း ဟုတ်နေတာနဲ့ ကျနော်ကပဲ အဖေအလိုကျ ဖြည့်ပေးလိုက်တယ်။ ကျနော်တို့ငယ်ငယ်က ဒီဟာမကြိုက်ဘူး ဟိုဟာမကြိုက်ဘူးဆိုတာတွေကို မငြီးမညူလုပ်ပေးခဲ့တာလေ။ ကျနော့်တို့အလှည့်ကျတော့ အဖေတို့ အမေတို့မကြိုက်ဘူးဆိုတာကို ဇွတ်ကြိုက်စေချင်တယ်။ နားလည်မှု ရပ်ဝန်းဟာ ကျနော်တို့အလှည့်ကျတော့ အဖေတို့ အမေတို့လောက် စိတ်မရှည်ကြတော့ဘူး။ 

ခုတော့ ကိုယ်ဆန္ဒရှိရာ ကိုယ်ဝယ်ပေးထားတာလေး ဝတ်စေချင်တယ် သုံးစေချင်တယ်။ ဒါပေမယ့် ကျနော့်အဖေက မသုံးဘူး။ အဖေမသုံးရင်လည်း သူများပေးလိုက်လားဆိုတော့လည်း မပေးချင်ဘူး ခက်တာက။ ဒါ ငါ့သားပေးထားတာလေ ဆိုတာကို သိမ်းထားချင်တာ။ အဖေ့အတွက် အသုံးတည့်မယ့် ပစ္စည်းလေးတွေ ကျနော် အဖေ့ကို ဝယ်ပေးလေ့ရှိတယ်။ တခါတရံတော့ အဖေ့ကို စမိတယ်။ အဖေမသုံးရင်တော့ လူလေးကို ပြန်ပေးလိုက်နော်ဆိုတော့ ခု သုံးနေပါတယ် လူလေးရာတဲ့။ 

ကျနော်ရန်ကုန်က ပြန်လာရင် အဖေကကြားကြားချင်း ကျနော်ဆီလာတယ်။ အဖေနေတဲ့ရွာနဲ့ ကျနော် တည်းတဲ့ရွာက တခြားစီကိုး။ အဖေလာနေအတိုင်း ကုန်းကြောင်း(ခြေလျင်)များတယ်။ အဖေရာ ထွေလာ (လယ်ထွန်စက်နောက်ဆွဲ)နဲ့ လာရင်ပြီးရော အဖေ့အတွက်ပင်ပန်းလိုက်တာဆိုတော့ “ပိုက်ဆံလည်း ပေးရသေး၊ ကိုယ်နားချင်တဲ့နေရာလည်း မနားရဘူး၊ ခြေလျင်က ကိုယ်နားချင်တဲ့နေရာ နားပြီး ပါလာတဲ့ ရေနွေးလေး ကျိုက်လို့ရသေးတယ်”တဲ့။ အဖေပင်ပန်းမှာစိုးလို့ပါဆိုတော့ ကိုယ့်အကြောင်းကိုယ်သိတယ် ဆိုတာနဲ့ ကျနော်ဘာမှဆက်မပြောဖြစ်ဘူး။ ခုထိ အဲ့ဒီအတိုင်းသွားနေတုန်း။ ဟိုတစ်ခေါက်ပြန်တုန်းက သူ့တူ တရုပ်ဆိုင်ကယ်လေးဝယ်ထားလေတော့ သူ့မြေးတွေမောင်းခိုင်းပြီး “လူလေးရေ မကြာပါဘူး ဖွတ် ချွတ်ပဲ” ဆိုပြီး သကျဲ(သွားကျဲ)လေးနဲ့ ပြောလေရဲ့။ ဒီလိုတော့ အဖေက ချစ်စရာ။

တခါက အဖေ့ကို စမိတယ်။ အဖေ ကျနော်မြို့သားနော်လို့။ “လူလေးရ ငါ့သား မြို့သားစစ်ချင်မှစစ်လိမ့်မယ်၊ ငါ့သားမြို့သားဖြစ်တိုင်း အဖေမြို့သားမဖြစ်ပါဘူး။ အဖေက တောသားစစ်စစ်ပဲ။ အဖေမြို့သားဖြစ်လည်း ကိုယ့်တောက လူတွေကိုသိသလို မြို့မှာသိဖို့မလွယ်ဘူး။ လွယ်လည်း လူလေးတို့ မြို့သားဆိုတာတွေက ခပ်ထယ်ထယ်တွေရယ်”တဲ့။ ဟုတ်တော့လည်း ဟုတ်မယ်။ တစ်နှစ်က အဖေ့ကို မြို့မှာ အကြာကြီးခေါ်ထား တော့ အဖေပျော်ရဲ့လားဆိုတော့ “ပျော်ပါဘူး လူလေးရာ လူတွေများသလောက် ကိုယ့်နဲ့သိတဲ့သူ တစ်ယောက်မှမရှိဘူး”တဲ့။ နောက်များတော့ အဖေပျော်သလောက်ပဲ။

ခု ပြောပြချင်တာက အဖေပြောတဲ့ ဖိနပ်ကိစ္စ။ ကျန်တာ ပြန်တိုင်းကျနော်ဝယ်ပေးထားခဲ့တဲ့ အင်္ကျီ နဲ့ပုဆိုးကိုဝတ်တယ်။ ဖိနပ် ကျတော့ သူလိုချင်တာမှာတယ်။ ကျနော်ဝယ်ပေးတာ မစီးဘူး။ ရန်ကုန်မှာ ခေတ်စားနေတဲ့ ဖိနပ်ဝယ်သွားတယ်။ မစီးဘူး။ ကိုယ့်တော ဗွက်နဲ့ အိုင်နဲ့ မဖြစ်ဘူးတဲ့။ ဆင်ကြယ် မြင်းကြယ်ဖိနပ်ဝယ်ပေးတယ် မစီးဘူး။ ခြေထောက်ရုန်းတိုင်း လိုက်နေတယ် ကီးမကိုက်ဘူးတဲ့ လူလေး ဖိနပ်က။ အဖေမှာတာလည်း ကြည့်အုံး ကားတာရာဖိနပ်ကောင်းကောင်းတဲ့။ အဖေ့နယ်ဗျာဆိုတော့ “အိုး လူလေးရဲ့ ဖိနပ်ကောင်းကောင်းတွေက ဆူးရှည်ရင်ကိုယ့်ထိသေးတာ၊ မိုးရွာရင်ပိုဆိုးတယ်၊ လူကြီးဆိုတော့ ချော်လဲ မှာလည်းကြောက်သေးတာ၊ နောက်ဆုံး တရားနာသွားရင်တောင် ကောင်းကောင်း တရားမနာရဘူး။ ကားဖိနပ်ဆိုတော့ တရားနာရတာကို ဖြောင့်လို့” တဲ့။ 

ဘာပဲဖြစ်ဖြစ် အဖေ့အကြိုက်ပေါ့။ ကျနော်က အဖေ့ ချစ်တာကိုး။

Sunday, October 10, 2010

ဟိုတုန်းက


တရံရောအခါက ဆိုပါစို့။ အဲ့ဒီရွာလေးကို ဟိုက ဒီက ဆရာဆိုသူတွေ လက်တဲ့လာစမ်းကြတယ်။ အတုလည်း ပါရဲ့၊ အစစ်လည်းပါရဲ့။ ခက်တာက ဘယ်သူမှ တံဆိပ်တပ်ပြီး အဲ့ဒီရွာလေးကို မလာကြဘူး။ ကြေညာသံ တွေနားထောင်ပြီး မှားရင်ခံ မှန်ရင်ကောင်းဆိုတဲ့ နိယာမလေပြေထိုးလေးနဲ့အတူပေါ့။ 

ကံမကောင်း အကြောင်းမလှသူကတော့ ဆရာကတော့ ပြောသား ငါတို့က ကံမကောင်းတာဆိုပြီး ဆူးပုံပေါ်တက်နင်းပြီး ကံကို ရိုးမယ်ဖွဲ့ကြလေရဲ့။ ဆေးကုလို့ကောင်းသွားသူကလည်း ဒီဆရာရောက် လာလို့ ငတို့ ကံကောင်းတာလို့ တွေးထင်ကြလေရဲ့။ 

ခက်တာက ရွာရှိ ကာလသားတွေပဲ။ လူငယ်လည်းဖြစ် အဲ့ဒီလိုယုံကြည်နေတာကိုလည်း လက်မခံနိုင်ဘူး။ ဆရာဆိုသူတွေလွဲတာထက် ရွာသားတွေခံနေရတာကို မကျေနပ်နိုင်ဘူး။ တောသူတောင်သားဆိုတော့ ဆရာဆိုရင် အမှားအယွင်းကင်းမယ်ထင်တာကိုး။ ဖြစ်ကာမှဖြစ်ရော ကံတရားက ကိုယ့်ဘေးနားမှာ ကိုယ့်လက်သုံးလို ဆွဲသုံးလို့ ရနေတာကိုး။ ဒီလိုနဲ့ အတိမ်းအစောင်းတွေ များမျာလာတော့ ကာလသား လူငယ်တွေ စဉ်းစားလာပြီ။ 

ဘာပဲဖြစ်ဖြစ် ရပ်ရွာအနေနဲ့ အရင်းအနှီးက များလာပြီ။ ဆရာတစ်ယောက်အတွက် လူနာတစ်ယောက် ဆုံးပါးတာ မစားသာပေမယ့် ရပ်ရွာက ဒီဆရာတစ်ယောက်တည်းမဟုတ်ဘူးဆိုတော့ နောက်ဘယ်လောက် ဘယ်အတိုင်းအတာထိ ဆရာတွေလာမလဲဆိုတာ မသေချာသေးဘူး။ ဆရာတွေကတော့ လာနေမှာပဲ။ ကွင်းစမ်းတာလား ဆေးစမ်းတာလား လူစမ်းမှာလားဆိုတာတွေ။

ဒီလိုနဲ့ အဲ့ဒီရွာလေးမှာ ကာလသားတွေ ခေါင်းချင်းဆိုင်ကြပြီ။ အတုလား အစစ်လားဆိုတဲ့ ဆရာ ဆိုသူတွေကို။ လာသမျှလက်ခံနေရင် ငတို့ရွာက စမ်းသပ်ကွင်းဖြစ်နေမယ်။ လာသမျှ ဆရာတွေ အတု အစစ်ခွဲကြစို့ရဲ့။ ဆရာအစစ်ဆို လက်ခံထား အတုဆို အနားမကပ်အောင် ငတို့ စမ်းသပ်ပြီးလက်ခံစို့။ အဲ့ဒီလို ဆွေးနွေးတာက ငါးယောက်နဲ့တစ်ဝိုင်းဖြစ်တာ။ ကျန်တဲ့သူတွေမသိဘူး။

လူငယ်တွေဆိုတာက ကိုလှရွှေ၊ ကိုစံရွှေ၊ ကိုသိန်း၊ ကိုမောင်မောင်၊ ကိုညွှန့်တို့ဆိုကြပါဆို့။ 
ဆရာတစ်ယောက်ရွာထဲဝင်လာပြီဆိုရင် တစ်ယောက်က ဗိုက်နာ ကျန်လေးယောက်ကလူနာစောင့် ဆရာ့ အရိပ်အကဲကြည့်ပေါ့။ ဆရာစစ်ဆိုရင်တော့ အဲ့ဒီဆရာ သက်သာမှာ၊ အတုဆိုရင်တော့ လာထားပဲ။ ညှာမှာ မပါဘူး။ ဘာမှမသိတဲ့ အတုဆရာက ဟိုဟာလုပ် ဒီဟာလုပ်ဆိုတော့ လူနာအတုလုပ်ထားတဲ့သူက ဘယ်သက်သာမှာတုံး။ လူနာလုပ်ထားသူက မသက်သာလေ ဆရာအတုခံရလေပေါ့။ သူတို့က အဲ့ဒီလို ရပ်ရွာကို ထိန်းသိမ်း စောင့်ရှောက်ခဲ့တာ။ ကိုယ့်အသိနဲ့ကို ဘယ်သူက ပြောလို့မဟုတ်ဘူး။

အဲ့ဒီတုန်းက ပျော်လည်းပျော် ရပ်ရွာအတွက် စိတ်လည်းချရတယ်တဲ့။ ခုတော့ရောဆိုတော့ အင်း...........တဲ့ သံရှည်ဆွဲပြီးငြီးရှာတယ်။ ဟိုတုန်းက ခေတ်မမှီလို့ လုပ်ရတာတဲ့။ ခုခေတ်မှီတော့ ဆေးရုံက ဆေးဝါးမစုံလင် ဘူးတဲ့။ ဆေးရုံလို့တော့ ပြောတာပဲတဲ့။  အပ်ပုန်းတွေက လက်စွမ်းထက်နေပြန်ရောတဲ့။ ကိုယ်လုပ်ခဲ့တာ လေးတော့ ကိုယ့်ရပ်ရွာအတွက် ခုထိ ကြည်နူးနေတယ်တဲ့။ သူတို့အသက်တွေ ပြန်မေးကြည့်တော့ လွတ်လပ်ရေးရပြီး ဆယ်နှစ်ဝန်းကျင်လောက်မှာလုပ်ခဲ့ကြတာလေ။ ခု လွတ်လပ်ရေးရတာ ဘယ်လောက် ကြာပြီလဲ။ အဲ့ဒါတွေ သူတို့ စိတ်ဝင်စားမှာမဟုတ်ဘူး။ သူတို့လုပ်ခဲ့တာတွေတော့ သူတို့ခုထိ ကျေနပ် နေတုန်း။တဆင့်စကားပြန်ပြောနေတုန်း။  အဲ့ဒီတုန်းက ဆရာအတု မလာရဘူးဆိုတာကို။
ခုတော့................။

Saturday, October 9, 2010

မုဒိတာကွက်လပ်


သူသူ ကိုယ်ကို 
ကရုဏာတရားတွေ
မေတ္တာတရားတွေ
ဥပေက္ခာတရားတွေ
ဘယ်လို ဘာကြောင့်ဖြစ်ဖြစ်
လက်လွယ်လွန်းတယ်။

ပေးစရာ ပေးလိုက်တာပဲ
ကျွေးစရာ ကျွေးလိုက်တာပဲ
အလှူဆိုတာ 
သိပ်မက်မက်စက်စက်ရှိတဲ့ လူမျိုးကိုး။

တစ်ခါတစ်ရံနဲ့
တစ်ချို့နေရာတွေမှာတော့
မုဒိတာပွါးဖို့
လက်နှေးလွန်းတယ်(သို့မဟုတ်)
မရှုစိတ်နိုင်လွန်းတယ်။

လူတစ်ယောက်က 
အများအတွက် လုပ်ဆောင်တယ်
အများအတွက် ကူညီတယ်
အများအတွက် စဉ်းစားတယ်
ခုထိ
ကိုယ်မလုပ်နိုင်တာကို သူများလုပ်ခြင်းအတွက်
ကိုယ့်မှာ သူ့အတွက် မုဒိတာမပွါးနိုင်သေးဘူး။

မေတ္တာတရားတွေ
ဥပေက္ခာတရားတွေ
ကရုဏာတရားတွေ 
တွင်တွင်လုပ်နိုင်ပါရက်နဲ့
အရင်းမစိုက်ရတဲ့ မုဒိတာတရားအတွက် 
ချို့တဲ့ ခေါင်းပါးလွန်းတယ်။

ဘယ်လိုကြည့်ကြည့်
လှတော့လှပါရဲ့
ယဉ်တော့ မယဉ်ကျေးသေးဘူး
ခုထိ
မုဒိတာတရားတွေ။

Thursday, October 7, 2010

အိပ်မက်စမ်းရေ စီးချောင်းများ


သိထား
သံကုန်ဟစ်နေရအောင်
ငါတို့ဟာ
ကိုယ်ပိုင်ကတဲ့ ဇာတ်မဟုတ်ဘူး။

အငှါးဆိုရင်
အကြွေးဆပ်ရတော့မယ်
နည်းနည်းလား
များများလား။

ကိုယ့်ဆုတောင်းကို
ကိုယ့်ကိုယ်ကို အားငယ်နေရမယ့်အနေအထားလား
ဒီလိုဆို
ငါ 
အိပ်မက်ကို စည်းမချတော့ဘူး။

ကိုယ့်ဝပ်ကျင်းနဲ့ ကိုယ်
ဝေးဝေးမပြေးကြပါဘူး
သံယောဇဉ်ဆိုတာ
သတ်ရင် သေရဲကြတာကိုး
ယုံကြည်မှုနဲ့။

တကယ်ပါ
အသံမကြားစေရဘူး
ကျနော့် အိပ်မက်ကို
လှပအောင် မက်ပါ့ရစေ။

Tuesday, October 5, 2010

ဖြတ်ဇာတ်


အနာအကျင်တွေကိုပဲ
တေးအဖြစ် သီဆိုနေကြမှာလား။

အခိုက်အတန့်
သောင်တင်နေခြင်းကို
ကြည့်ချင်ပွဲလို စောင့်ကြည့်နေကြ။

ဇာတ်သိမ်းခန်းဆိုတာ
ဟိုတုန်းက ပြောနေကြ
ရွှေဘလက်သီးပဲ လိုတာပါ။

တကယ်တော့
ငိုချင်းရှည်ဆိုတာ
မိုးလင်း မကနိုင်မှတော့
ဘာလို့ ဆက်ငိုနေအုံးမှာလဲ။

ကဲ...........
အိပ်ရေးပျက်ပေါင်းများပြီ
မိုးလင်းကြပါတော့။

Sunday, October 3, 2010

မိန်းခေးရေ


အဲ့ဒီနေ့က မိန်းခေးဆီ
ဖုန်းဆက်ဖြစ်တယ်
“စိမ်းဖန့်ဖန့် မျက်နှာတွေကြား
ပျော်ရဲ့လား အစ်ကို” တဲ့
မေးလိုက်တဲ့ မေးခွန်းပါ။

မိန်းခေးရေ
အစ်ကို ပျော်ပါဘူး
မိသားစုနဲ့ ဝေးနေရတဲ့ဘဝ
ဘယ် နေသားကျတယ်ဆိုတာ ရှိပါ့မလဲ။

မိန်းခေးရေ
နင်က အမေ့လိုပဲ
ပြတ်ပြတ်နဲ့လိုရင်းပြောတယ်
ဒါနဲ့ အမေ့ကို လွမ်းဖြစ်ပြန်ရော။

မိန်းခေးရေ
သတိရတယ်
“အဖေရော နေကောင်းလား” ဆိုတော့
“ကောင်းတယ်..........အငြိမ်မနေတာ ခက်တယ်” တဲ့
ယောက်ဖကလည်း အဲ့လို ပြောဖူးတယ်
ဟုတ်တော့လည်း ဟုတ်တယ်
အဖေက ဆွေမျိုးမက်တယ်
အလှမ်းဝေးတဲ့ ဆွေမျိုးတွေဆီ သွားရတာအမော။

“အဖေစိတ်ချမ်းသာအောင် ထားပါဟ” ဆိုတော့
မိန်းခေးက
“ဟင်း......ဟင်း” တဲ့
အမေ့လို ရွဲ့ရီ ရီတာမလားမသိ
“ထားပါတယ်....ထားပါတယ်” တဲ့
အဖေက ၇၅နှစ်ကျော်ပြီကိုး။

မိန်းခေးရေ
နင်က ကံကောင်းတယ်နော်
အဖေ့အရိပ်အောက်မှာ
အမြဲတမ်းနေခွင့်ရတယ်
ငါကတော့
ဓါးအိမ်မရှိတဲ့ ဓါးတစ်ချောင်းလို
နည်းနည်းနီးလိုက်
ဝေးဝေးရောက်သွားလိုက်
အဝေးရောက်လွမ်းနေခြင်းနဲ့
လွမ်းနေတတ်ပါပြီ။

မိန်းခေးရေ
အဖေနဲ့ မိန်းခေးကို
ငါ လွမ်းတယ်
တစ်ယောက်တည်း ခရီးလွန်သွားတဲ့
အမေ့ကိုလည်း လွမ်းတယ်။


မှတ်ချက်။        ။(ကျနော့် တစ်ဦးတည်းသော ညီမလေးနေတဲ့ရွာမှာ ကိုယ့်အောက်ကညီမလေးကို မိန်းခေး(မိန်းကလေး)လို့ ချစ်စနိုးနဲ့ခေါ်ကြတယ်)

Saturday, October 2, 2010

တစ်ခါမြင် စာမျက်နှာများ


ဟူး.............ဆိုတဲ့
သက်ပြင်းချသံတွေ
ဘယ်လောက်ထိ ကြားနေရအုံးမလဲ
ကျနော်နဲ့ ကျနော့်ဝန်းကျင်။

ပြီး...ပြည့်...စုံ ဘဝတဲ့
ဘယ်မှာလဲ
ဘယ်တော့လဲ
ဘယ်နေ့လဲ........
နေ့စွဲပြောင်းနေတဲ့ အဲ့ဒီ လဲ...တွေနဲ့ပဲ
ဘဝဟာ အဖာအထေးကိုဖြစ်လို့။

နေ့ပြန်တိုးတွေနဲ့ ရင်းနှီးထားရတဲ့ဘဝ
ဘယ်မှာ ဘယ်လို ဘယ်နည်းနဲ့
ပျော်မွေ့နေနိုင်မှာလဲ။

ကောင်းကင်ရေ
ကျေှးဇူးပြုပြီး နေဝင်မစောပါနဲ့
အမှောင် ခဏ ခဏကျနေမှာကို
စိုးရိမ်လွန်း...လွန်းလို့ပါ။

သက်တမ်းရှည်ဖို့ ကြိုးစားနေတဲ့ မြွေပွေး
အဆိပ်တွေ များမလာဖို့
တကယ်တော့ ဘဝဆိုတာ
သေမယ့်သူနဲ့
သတ်မယ့်သူ ရှိရင် ပြီးပါတယ်တဲ့
လိုမှမလိုတာ
ဘယ်အရာဟာ ဘယ်လောက်ထိ
မြဲနေမှာမို့လို့လဲ။

ဒါပါပဲ
သမိုင်းမရှိတဲ့ နေ့စွဲကိုတော့
ဘယ်သူမှ စာမျက်နှာ ကျော်မဖတ်ကြဘူး။

Wednesday, September 29, 2010

ကျနော်နဲ့ အဇ္ဈတ္တလူမျိုးများ


ကျနော့်ဇာတိရုပ် ကျနော်ပေါ်လွင်ချင်တယ်
ကျနော် မြန်မာပါ
ဘယ်တော့မှ အပြောင်းအလွဲမရှိဘူး
ကျနော် နိုင်ငံကူးတာထက် လူမျိုးမကူးဘူး။

ကျနော်ချစ်တာ ကျနော့်နိုင်ငံပဲ
ကျနော် ဗမာလူမျိုး
တရုပ်လည်းမဖြစ်ဘူး
ကုလားလည်းမဖြစ်ဘူး
ထိုင်းလူမျိုးမဖြစ်ဘူး
ကျနော်ကျေနပ်ထားတာ ကျနော်ပြောတာ
စစ်စစ်လို့ ခံယူထားတဲ့ကျနော်
အခြားနာမည် ကျနော် မပြောင်းလဲဘူး။

သူတို့စကားမှ မတတ်တဲ့ ကျနော် 
ရှမ်းဖြစ်လို့မရဘူး
ချင်းဖြစ်လို့မရဘူး
မွန်ဖြစ်လို့မရဘူး
စသည် စသည် ကျနော်ဖြစ်ခွင့်မရှိဘူး
ဖြစ်နေတဲ့ဘဝမှာ စစ်စစ်ဖြစ်ဖို့ကိုပဲ
ကျနော့်ကို ကျနော်ကြိူးစားရင်း
ကျနော့်ကို ကျနော်ဂုဏ်ယူတယ်။

လူမျိုးပြောင်းချင်လည်း ပြောင်းကြ
ကျနော် ဗွေမယူဘူး
ကိုယ့်သိက္ခာ ကိုယ့်လူမျိုးနဲ့ ကိုယ်ကိုး။

ဒါပါပဲ
ကျနော်ကတော့ စစ်စစ်ပဲ
ကျနော် ဗမာ(သို့) မြန်မာပါ။

Monday, September 27, 2010

ကျနော်နဲ့လေလွင့်စက္တင်္ဘာ


ဗြဟ္မစိုရ်တရားတွေ ဖြန့်ကြဲထားခဲ့တဲ့
အဲီ့နေ့ရက်တွေ ရောက်ခဲ့ပြန်ပေါ့
တူးတူးခါးခါး ငြင်းပယ်ခဲ့တာ
ရေနဲ့အတူ မျောခဲ့ရပြီ။

ဗြဟ္မစိုရ်အစစ်တွေပါ
နောင်တ ရစရာမရှိဘူး။

တကယ်တော့
ဗြဟ္မစိုရ်စာမျက်နှာတွေ
အရင်က အတိုင်းပါပဲ
ရွှန်းရွှန်းကို လက်လို့။

ဗြဟ္မစိုရ်ရင်ဘတ်တွေဆိုတာ
ဟာလာဟင်းလင်းပါ
တခြားအဓိပ္ပါယ်တွေ မရောထားဘူး။

ဒါပါပဲ
မကျေဘူးဆိုတာမရှိဘူး
ဒဏ်ဆိုတာမရှိဘူး
အချိန်မရွေး လာအုံးမယ်
ဗြဟ္မစိုရ်မေတ္တာတရားတွေနဲ့ အတူပေါ့။

Sunday, September 26, 2010

ကျနော်နဲ့ အဝေးကွင်း အနီးကွင်းမှတ်တမ်းများ


ဒီနေ့ထိ
ကွင်းရွေးနေတာလား
ဒါဆို 
ကျနော် လူရွေးမှားသွားပြီ။

ယနေ့ထိ
လူရွေးနေတာလား
ဒါဆို
ကျနော် ကွင်းရွေးမှားသွားပြီ။

ဘဝတသက်စာ အနားယူလိုက်တဲ့ဘဝတွေ
အနီကတ်တွေထိထားတဲ့ဘဝတွေ
စာမျက်နှာတွေ ဘယ်လောက်များခဲ့ပြီလဲ
ဒါတွေသိလျက်နဲ့
ကွင်းရွေးနေအုံးမယ်
လူရွေးနေအုံးမယ်ဆိုရင်
ဆိုရင်..........
ဆိုရင်....................
ကျနော်တို့ မန်နေဂျာခန့်တာမှားသွားပြီ။

ဒီလိုနဲ့
ဖြေ...သိမ့်...ရ...မှာ...လား?
မတရားမှုဟာ
ဒီလိုနည်းနဲ့တော့
နေရာမရဘူးဆိုတာကို။

Saturday, September 25, 2010

ကျနော်နဲ့လွတ်လပ်ခြင်းရဲ့အား


နေတတ်လွန်းတဲ့ဘဝတွေကို
နာကျည်းနေတာတော့မဟုတ်ဘူး
သူသူကိုယ်ကိုဘဝတွေ
ဖြေဆည်ရာမရသေးတာတော့
ပြန်တွေးရင် ဇစ်ပျက်နေတဲ့ဘဝတွေလား။

ဖြည့်တွေး ပေးထားတာကိုပဲ
နားလည်မှုဟာ တောင်ပံတပ်ပြီး
အဝေးရောက်နေပေါ့
ဘာတတ်နိုင်မှာလဲ
ဝေးနေတာကို အစကတည်းက နားလည်ပြီးသား။

လွတ်လပ်ခြင်းရေ
ငါ စာမျက်နှာတွေအတပ်မှားခဲ့လို့လား
ဟုတ်လောက်ပါဘူး
စာနာမှုတွေနဲ့ လွတ်လပ်ခြင်း
နားလည်မှု ပြောင်းပြန်မောင်းနေသလားလို့။

သူများ ဒဏ်ရာတွေ
ငါ့ ဒဏ်ရာနဲ့ဖာထေးထားတာ
ဘယ်သူမှမသိပါစေနဲ့

ကဲ
လွတ်လပ်ခြင်းရေ နားထောင်
ခုထက်ထိ
ငါ့ရင်ဘတ်နဲ့
ငါ့ခံစားမှုတွေဟာ
ကမ္ဘာမကျေ အစစ်တွေချည်းပဲ။

Tuesday, September 21, 2010

ကျနော်နဲ့ စောင့်ဖတ်နေရတဲ့ နေ့စွဲများ


မချင့်မရဲ အားမလို အားမရဆိုတာတွေနဲ့
နေ့စွဲတပ်မရတဲ့ဘဝတွေ
ဘယ်လောက်များခဲ့ပြီလဲ။

မနက်ဖြန်မျှော်လင့်အားကိုးနဲ့
ဒီနေ့ ရပ်တည်နေတာကိုးက
တံဆိပ်ပြေသွားတဲ့ဆေးလိပ်
ပြန်လိပ်သောက်နေရသလို။

ငါတို့ရဲ့ ဝင်လေထွက်လေကို
ငါတို့ ဘယ်လောက်ထိ ထိန်းထားနိုင်မှာလဲ
ရှေးရိုးအတိုင်းပဲ ကံကြမ္မာကိုစောင့်စားနေတာလား
ဒါဆို
အလင်းမပြတ်ဖို့တော့
ဖယောင်းတိုင်ကို မီးတို့ထားအုံးမှ။

ငါ့နေ့စွဲနဲ့ ငါ
လက်တစ်ဆုပ်စာ တိမ်တိုက်နဲ့တော့
ငါ မိုးမရွာဘူး။

Sunday, September 19, 2010

ကျနော်နဲ့ခေတ်အဆက်ဆက်ဂီတများ


နားပါတဲ့ သတ္တဝါအတွက်
ဂီတနဲ့ကင်းဝေးခွင့်ရှိသလားဆိုတာ
ကျနော် ဘယ်လိုဆင်ခြင်ပေးရပါ့။

ယဉ်ကျေးမှုဆိုတာ ခံစားချက်တွေလား
အဲ့ဒီအတိုင်းဆို
ကျနော် ကျောက်ထွင်းအက္ခရာတွေဖြစ်မှာပါ။

တစ်ချို့ပြောကြတယ်
အနီးဆုံးဆိုတာဂီတပဲ
အဝေးဆုံးဆိုတာလည်း ဂီတပဲတဲ့
ကျနော် ဘယ်လမ်းကို လိုက်ရပါ့။

လမ်းညွှန်ပေးမည့်သူရှိရင်
ကျနော် ဖြစ်ကောင်းဖြစ်လိမ့်မယ်
အရပ်ကူပါ လူဝိုင်းပါဆိုတာမျိုးလိုပေါ့။

တကယ်ဆို
ဖြစ်သင့်တာက
ကျနော့်ကို ဂီတအဆက်ဆက်
နားဆင်ခွင့်ပြုပါ။

Wednesday, September 15, 2010

ကျနော်နဲ့ဟိုတစ်စ ဒီတစ်စကြိုးစများ


ရှိခြင်းရဲ့အရိပ်မှာ
မမြင်သာတဲ့ ကြိုးတစ်ချောင်းစီတော့ရှိရဲ့။

ကြိုးဆိုတာက
ဘယ်သူ့ကိုမှ
လိုက်ချည်နေမှာတော့ မဟုတ်ဘူး 
ကိုယ့်ကိုယ်ကို ပြန်ချည်ပြီး
ကိုယ်တိုင်ပြန်ရုန်းကန်နေကြ။

ကြိုးများများ ချည်ထားလေလေ
များများရုန်းရလေပေါ့
ချည်တိုင်မိတဲ့ဘဝဆိုတာ
တစ်ကြိုးလွတ် တစ်ကြိုးပြန်ချည်လိုက်နဲ့
ရုန်းလက်စကို မကုန်နိုင်ဘူး။

ရုန်းရင်း ရုန်းရင်း
ဆုံးတော့မယ်မှတ်နေမိ
ရုန်းတိုင်း ကြိုးပြေမတဲ့လား
ကြိုးမပြေပေမယ့်
ကြိုးပြတ်သွားတော့
ကြိုးပြန်ဆက်ပြီး ဆက်ထုံးနဲ့
ရုန်းလို့ ကန်လို့။

အင်း........
ဘဝနဲ့ကြိုးတွေ
ဘယ်လောက်ထိ ခုံမင်နေမယ် မသိ။

Sunday, September 5, 2010

ကျနော်နဲ့မနက်ဖြန်များ


ကြားဖူးနားဝ ရင်ခုန်သံတွေနဲ့
ဘဝကို ဒီလိုပဲ ထုဆစ်လိုက်တော့မှာလား
ဒါဆို 
ယူ....ကျုံး.........မရ ဆိုတာတွေ
ဘယ်လောက်များလိုက်လေမလဲ။

ကဲ........ကြည့်
သဲသဲကွဲကွဲ ရင်ခုန်ခြင်းတွေ
တစ်ဖြည်းဖြည်း နှေးနှေးလာပေါ့။

ခုထိ
ဆုံးဖြတ်ချက်တွေ မှားနေကြအုံးမလား
ခုထိ ကိုယ့်ကိုယ်ကို
လိုအပ်ချက်တွေနဲ့ လုံးချာလိုက်နေအုံးမလား
ခုထိ ကိုယ့်ရင်ခုန်သံ
ကိုယ် နားမလည်သေးဘူးလား။

ပြန်လှည့်ကြည့်နေတဲ့
အတိတ်က ဒဏ်ရာဒဏ်ချက်တွေ
ထားရစ်ခဲ့တော့။
ဒီလိုမှမဟုတ်ရင်
လှပတဲ့မနက်ဖြန်များ
မျှော်ရင်းနဲ့ ဝေးနေအုံးမပေါ့။

Saturday, September 4, 2010

ကျနော်နဲ့အိပ်မက်များ


အလင်းအမှောင် တစ်ခြမ်းစီပိုင်ထားတဲ့
အဲ့ဒီ နေ့နဲ့ညတွေ
ဘယ်နှစ်ခါမှန်းမသိ ကျော်လွန်းသွားကြတာ
ငါ့ကို အိပ်မက်တွေက ငယ်နိုင်အလား
နှိပ်စက်လွန်းပေါ့။

တစ်ခါတစ်ရံ
ညရဲ့ခြေထောက်တွေက ရှည်လွန်းတာလည်း
ခက်နေကြဆဲ။

မမက်ဘူးတဲ့အိပ်မက်တွေက
အဝေးက ပစ်တဲ့မြှားလို
ထိချက်ကို ပြင်းလွန်းတယ်။

နေ့လိုနေရမလား
ညလိုနေရမလားဆိုတာ
အိပ်မက်တွေမသိသမျှတော့
အိပ်မက်တွေက ကျနော့်ဆီ
လာနေအုံးမှာပါပဲ
အိပ်မက်ရေ..............
လာခြင်းကောင်းပါစေ။

Friday, September 3, 2010

ကျနော်နဲ့ရွေးချယ်ခြင်းများ


အရှုပ်ထုပ်တွေထမ်းပြီး
သင်္ချိုင်းထဲဝင်မယ်လုပ်တော့
လက်မခံဘူး
အမှိုက်ပုံများမှတ်နေသလားတဲ့။

အသက်(၃၅)ကျော်လာပြီ
ရှုပါအတွက် မက်နေရင်
ဇရာဆီ မြန်မြန်မရောက်ဖို့
စိတ်နုပျိုအောင် 
ဘာဝနာဘက် လှည့်ရတော့မယ်။

တကယ်တော့
ဘယ်ဘက်ကကြည့်ကြည့်
ရိက္ခာဆိုတာ
သိက္ခာတရားစစ်စစ်တွေပါ။
(သီလ၊ သမာဓိ၊ ပညာ)

Saturday, August 28, 2010

နေထွက်နေဝင်


ပတ်စာမပါတဲ့
ဗုံတီးသံတွေ ကြားလာရပြီ။

ဆွံ့အ လက်စ နားတွေ
ဒီလိုပဲ ကြက်ခြေခတ်ကြ။

ပါးစပ်နဲ့နား
ပိတ်လက်စအတိုင်း
အေးဆေး။

Friday, August 20, 2010

လျှောက်ရမယ့်လမ်း


ချစ်ခြင်းတရားတွေလေ
အချိန်တွေနဲ့ ပေးဆပ်မှုတွေများခဲ့မိပေါ့။
(နောင်တမှိုင်းတွေနဲ့ မူးချင်လည်းမူးတော့)

ချည်နှောင်မှုတွေဟာ
ရစ်ပတ်မှုသက်သက်နဲ့ပဲ 
ငါတို့ချစ်ခြင်းတရားတွေ
အားလုံး.............အားလုံး......
ဗြဟ္မစိုရ်တရားထိ မရောက်ခဲ့ဘူးနော်။

ချစ်ခြင်းတရားတွေ
အထားအသိုမတတ်တာနဲ့
လွဲချော်မှုတွေ ဒုနဲ့ဒေး။

တစ်ကယ်ဆို
ချစ်ခြင်းတရားဟာ
အားလုံးတို့ရဲ့ Feeling တွေပါ
အာရုံစိုက်မှုတွေ အားနည်းတာနဲ့
လွတ်လပ်မှုတွေလည်း ဝေးရင်းနဲ့ ဝေး........။ 

အစကတည်းက
ချစ်ခြင်းတရားဟာ
ဗြဟ္မစိုရ် ဖြစ်ခဲ့မယ်ဆိုရင်
ဒီလောက်ထိ စကားလုံးတွေ  ဖောင်းပွနေမှာ မဟုတ်ဘူး။
ဒီလောက်ထိ လွတ်လပ်ခြင်းတွေ ဝေးနေမှာမဟုတ်ဘူး။

ဖြတ်ကျော်ခြင်းမဟုတ်တဲ့ ဖြတ်သန်းမှုများ


ဖြတ်ကျော်ဖို့
ငါ့ဂုဏ်သိက္ခာက စဉ်းစားထားတာမဟုတ်ဘူး
ဖြတ်သန်းဖို့သက်သက်နဲ့
အိပ်မက်တွေ ခုထိ ဆက်မက်နေတာ။

နားလည်ထားဆဲ
အပြောင်းအလဲဆိုတာ
အဝတ်အစားပြောင်းပြီး
ဒီလူနဲ့ ဒီလူဆိုတာကတော့
ခုနစ်ထွေအက ထက်မပိုပါဘူး။

အလွမ်းအဆွေးစုံခဲ့ပေါ့
ဇာတ်မသိမ်းနိုင်သေးတာ
ဇာတ်ကိုက မျောလွန်းတယ်။
ရာသီတွေသိမ်းဆည်းထားတဲ့
ငါတို့မျက်ရည်တွေ
နွေမှာ ခမ်းခြောက်
မိုးမှာ ရေနဲ့ရော
ဆောင်းမှာ အေးခဲ
အသဲနှလုံးတွေ ရဲရဲနီနေသေးတာ
ဂုဏ်ယူမိ။

ဒါပါပဲ
ဂုဏ်သိက္ခာအတွက်
နှလုံးသားတွေ နီရဲနေဖို့
ဖြတ်သန်းဆဲ.......
ဖြတ်သန်းရင်းနဲ့.............။

Monday, August 16, 2010

မုန့်လုံးရေပေါ်လူစားများ


သူတို့မှာ
ဟိုး.......တုန်းက 
ဘယ်နေလို့ ဘယ်ရောက်နေမှန်းမသိ
အခွင့်အရေးဆိုတာနဲ့
ကောင်းသလား ဆိုးသလားမတွေး
ဘယ်ချောင်က ဘယ်လိုထွက်ရ ထွက်ရ
ဒါရိုက်တာမောင်ဝဏ္ဏပြောသလို
နှစ်တုံးစားဖူးခဲ့တာတောင် အမှတ်မရှိဘူး။

ရောက်ရောက်ချင်း ရေစိမ်ခံ
ပြီး အထောင်းခံ
ပြီး အမှုန့်အကြိတ်ခံ
ပြီး အနှိပ်အနင်းခံ
ပြီး အလှိမ့်အလုံးခံ
ပြီး အပူထဲထဲ့ခံ
ပြီး ရေအမွန်းခံ
ပြီး နာမည်ပျောက် ပေါ်လောပေါ်
ပြီး အစားခံရ။

အဲ့ဒါပဲ
အခွင့်အရေးဆိုတာနဲ့
မုန့်လုံးရေပေါ်တွေဆိုတာ
တစ်လုံးပြီးတစ်လုံး
တစ်လုံး.....ပြီး....တစ်လုံး။
ဟော ဘာတဲ့  “ပလုံ
ပေါ်လာတာလား?
နစ်သွားတာလား?

Thursday, August 12, 2010

ဘလော့ဘ်ဂါ တနှစ်ပြည့် အမှတ်တရ


လက်ရှိကို ပစ္စုပ္ပန်အနေအထားဖြစ်ဖို့ အတိတ်ကို စစ်ကူခေါ်နေရမြဲ။
ကျနော်လား? 
ကျောက်စိမ်းစကားနဲ့ပြောရရင် အရိုင်းတုံးစစ်စစ်ပါ။ ကျနော်ပြောခဲ့တဲ့စကားတွေ ခံစားခဲ့တဲ့ခံစားမှုတွေ အားလုံး အရိုင်းသက်သက် မြင်ကောင်း မြင်နေမှာပါ။ ဒါလည်း ကျနော့်ခံစားမှုဟာ အရိုင်းသက်သက်ပါပဲ။ 

အရိုင်းဆိုတာ မြို့ပြယဉ်ကျေးမှုမပါတဲ့ အရိုင်းသက်သက်ပဲ ဖြစ်နေတာပါ။ ခံစားမှုအားလုံးဟာ ကျနော်နဲ့ထပ်တူမကျတောင် ကျနော်နဲ့နည်းပါး ခံစားမှုရှိကောင်း ရှိနေမှာပါ။ ဒီလိုထင်တာလည်း ကျနော့်ရဲ့အရိုင်းစစ်စစ်ပါ။ ကျနော့်စစ်စစ်တွေ ဖတ်ပေးဖော်ရတဲ့အတွက် ကျနော်ကျေးဇူးတင်ပါတယ်။ တစ်ကယ့်ကို ကျေးဇူးတင်ပါတယ်။

မရှိညစ်ကျယ်ရေးဖို့အတွက် တွန်းအားပေးခဲ့တဲ့ ကျနော့် ဓမ္မဂင်္ဂါကြီးကို ကျေးဇူးတင်ရမှာပါ။ သူနဲ့ကျနော့်အကြား ဟိုစပ်စပ် ဒီစပ်စပ်နည်းတူ သူကမှတ်အားပိုသာခဲ့တယ်။ သူ့ရဲ့ဖန်တီးမှုနဲ့ ဒီဘလော့ဂ်ပေါ်လာတာပါ။ ကျနော့်ဘလောဂ်အတွက် သူက အဓိကတွန်းအားပါ။ ဒီလိုနဲ့ ကျနော်ရေးဖြစ်ခဲ့တယ်ဆိုပါတော့။ ကိုယ့်အကြိုက် ကိုယ့်ခံစားမှုရေးရတာ ဆိုတာကတော့ အားလုံးထပ်တူ ဖြစ်ချင်မှလည်း ဖြစ်မှာပေါ့။ ဒီအတွက်လည်း ငြင်းခုံစရာအကြောင်းမရှိပါဘူး။ တစ်ကိုယ်ရေ တစ်ကိုယ်ရအတွက် ကျနော့်မှာ အငြင်းပွားမှုမရှိပါဘူး။ ဒီအတွက်လည်း အရိုင်းစစ်စစ်ပါပဲ။

comments တွေရေးပေးတဲ့သူတွေလည်း ကျနော် ကျေးဇူးတင်ပါတယ်။  comments ပေးခဲ့တဲ့သူတွေကို သီးသန့်မဖေါ်ပြတော့ပါဘူး။ နားလည်မှုအတွက် စကားလုံးနဲ့ဖေါ်ကျူးဖို့ကို ဘဝင်မကျမှုတွေ ဖြစ်မလာစေချင်ဘူး။ ဒီအတွက် နားလည်မှုဟာ နားလည်မှုသက်သက်ပဲလို့ ဖြစ်နေစေချင်ပါတယ်။ ကျေနပ်ပျော်ရွှင်ပါစေ။ 

ကျနော်ရေးတိုင်း လိုက်ပြီးနှစ်သက်ဖို့ဆိုတာ ဘယ်လိုမှညှိလို့မရတဲ့ ခံစားမှုပါ။ comments ပေးခြင်းဆိုတာကတော့ သီးသန့်ခံစားမှုပါပဲလေ။ တကူးတကန့် လာဖတ်ပေးဖေါ်ရတာကိုပဲ ကျေးဇူးတင်စရာပါ။ စကားရှည်ရှည်ပြောရတာထက် စကားတိုတိုပြောရတာကို နှစ်သက်မိတော့ ကဗျာအမည်တပ်ထားတဲ့ အရာတွေပဲ ကျနော့်မှာ တခုတ်တရဖြစ်လို့။ ဒီအတွက်လည်း ကျနော်ဟာ အရိုင်းစစ်စစ်ပါ။

ဒီလိုနဲ့ ဒီနေ့(သို့မဟုတ်)မနက်ဖြန်ဆို ကျနော့်ဘလော့ဂ် တစ်နှစ်ပြည့်ခဲ့ပြီပေါ့။  ပျော်ရွှင်မှုတွေ လိုလားမှုတွေ အားလုံး (အစစအရာရာ)ပေါ့ ဝေဘန်သုံးသပ်ရင်း မနက်ဖြန်ဟာ ကျနော်မျှော်မှန်းထားတဲ့ မနက်ဖြန်ဖြစ်နေမလားလို့။ 

ကျနော် အရိုင်းစစ်စစ်နဲ့ပဲ ရှေ့ဆက်ချင်ပါသေးတယ်။ 
ကျနော့်ဘလော့ဂ်ဖတ်ဖြစ်သူအားလုံး ကံတရားနဲ့မဆန့်ကျင်ဘဲ ဖြစ်ချင်သလို ဖြစ်ခွင့်ရပါစေ။ 
ဘလော့ဂ်ရေးစက ကဗျာလေး ပြန်လည်ဖေါ်ပြလိုက်ပါတယ်။ 

 အစွန်းရောက် လိုချင်တပ်မက်မှု
ကိုယ်တို့ဆီ
သူ ၀င်လာပြီဆိုရင်....
အပေါင်းက အနှုတ်ဖြစ်သွားတယ်။

သူ ၀င်လာပြီဆိုရင်...
ရင်ဘတ်က နောက်ကျောဖြစ်သွားတယ်။

သူ ၀င်လာပြီဆိုရင်...
မိတ်ဆွေက ရန်သူဖြစ်သွားတယ်။

သူ ၀င်လာပြီဆိုရင်...
ချစ်သူက မုန်းသူဖြစ်သွားတယ်။

သူ ၀င်လာပြီဆိုရင်...
အစုအဝေးက အထီးကျန်ဖြစ်သွားတယ်။

သူ ၀င်လာပြီဆိုရင်...
စည်းလုံးမှုက သွေးကွဲမှုဖြစ်သွားတယ်။

သူ ၀င်လာပြီဆိုရင်...
ရိုးသားမှုက လ်ိမ်ညာမှုဖြစ်သွားတယ်။

သူ ၀င်လာပြီဆိုရင်...
ပေးသူက ယူသူဖြစ်သွားတယ်။

သူ ၀င်လာ
သူ ၀င်လာပြီ..
သူ ၀င်လာပြီဆိုရင်....။

Wednesday, August 11, 2010

အငြိမ်(သို့မဟုတ်)တစ်ကိုယ်ရေညများ


မှားယွင်းဖို့ သက်သက်နဲ့တော့
ကိုယ့်ဘဝကို 
ဘယ်သူမှ မှားယွင်းဖို့ မစဉ်းစားထားဘူး။

ရပ်တည်မှုဟာ
အရိုးသားဆုံး ရပ်တည်မှုပဲ
လှိုင်းဆိုတာတွေလာအုံး
ငါ့ရပ်တည်မှုနဲ့ ငါပဲ။

ဝေရမဏိတွေ ထုပ်ပိုးသိမ်းဆည်းနေချိန်
သိက္ခာချမယ့် ဝိုးတဝါးပြစ်ချက်တွေ
ခပ်ခွါခွါက လှမ်းမပစ်ပါနဲ့
ငါ့ အတိုင်းအတာနဲ့ငါ မစိုးရိမ်တတ်ဘူး။

အငြိမ်ဆိုတာ
ဘယ်သူမှ အမြဲတမ်း ဆောက်တည်မထားဘူး
သွေးအေးလို့ ချွေးသုတ်နေတာပဲ ရှိမယ်
ကိုယ့်ဘဝ ကိုယ် ရပ်တည်ထားမယ်ဆိုရင်ပေါ့။

Tuesday, August 10, 2010

လှေအတူ စီးမိသူများအကြောင်း


သူငယ်ချင်း
မင်းမှာလည်း
လိပ်စာမတပ်ထားတဲ့ ရောဂါတွေနဲ့
လုံးချာလိုက်လို့။

မင်းမရှိလည်း ဖြစ်တယ်တဲ့
သူငယ်ချင်းက ပြောတယ်
ငါ့မှာဖတ်စရာစာအုပ်တွေ ရှိနေရင်တဲ့။

ထပ်ပြောတယ်
မင်းမရှိတော့ရော ဘာအရေးလဲတဲ့
ငါ့မှာ စိုက်ပျိုးစရာ မြေကွက်လေးရှိရင် ဖြစ်တယ်တဲ့။

ဟော
ပြောပြန်ပြီ
မင်းမရှိတော့လည်း ငါနေတတ်တယ်တဲ့
ငါ့စိတ်ကို ငါ ပန်းချီပြန်ဆွဲမယ်တဲ့။

ဖြစ်တယ်ဆိုလည်း ဖြစ်တယ်ပေါ့
အစာကြေခြင်း မကြေခြင်းဆိုတာ
စားမိတဲ့အစာနဲ့ အစာအိမ်နဲ့ဆိုင်ပါလိမ့်မယ်
မင်းနဲ့ငါကြား
နာမည်မတပ်ထားတဲ့ ရောဂါတွေနဲ့တော့
မရှုပ်ထွေးစေချင်ဘူး။

မှတ်ချက်။   ။ မကြာခဏ စိတ်အစာမကြေတတ်သော ကျနော့်ဘော်ဘော် ပုစဉ်းရင်ကွဲများသို့

Monday, August 9, 2010

မှိုင်းခံစက္ကူ နေ့စွဲများ


ဆင်းရဲလွန်းသူဟာ
အစစ အရာရာ
ဈေးကြီးတယ် ထင်တယ်တဲ့။

ရှာဖွေနေကြဆဲ
ဘယ်မှာလဲ ချမ်းသာခြင်းရေ။

ကြည့်...
အဝေးကဖြစ်ဖြစ်
အနီးကပ်ကြည့်....
လွတ်လပ်မှုလည်း ဆင်းရဲတာပဲ။

ပြောဆိုမှုလည်း ဆင်းရဲတာပဲ။

ပညာရေးလည်း ဆင်းရဲတာပဲ။

အစားအဝတ်လည်း ဆင်းရဲတာပဲ။

အလင်းရောင်လည်း ဆင်းရဲတာပဲ။

အသိပညာလည်း ဆင်းရဲတာပဲ။

ဆက်သွယ်မှုလည်း ဆင်းရဲတာပဲ။

ငဲ့ညှာမှုလည်း ဆင်းရဲတာပဲ။

မေတ္တာတရားလည်း ဆင်းရဲတာပဲ။

အဆင်ပြေမလားလို့
မြေရောင်း တွင်းထွက်ရောင်း
ရောင်း ရောင်း ရောင်း
အင်း........ဆင်းရဲတာပဲ။

တကယ်တော့
တစ်ခု(သို့မဟုတ်) အရာအားလုံးအတွက်
ဆင်းရဲတာနဲ့ အချိန်ကုန်ခဲ့ပါလား။

Friday, August 6, 2010

သိနေခြင်း၏ နောက်ဆက်တွဲများ


စကားလုံးတွေ လွယ်ခြင်းဟာ
ခိုင်ခိုင်မာမာ ဂတိတွေမဟုတ်ဘူးနော်။

ပြေးပြေးလွှားလွှားစကားလုံးတွေနဲ့
ဘဝကို ဒီအတိုင်း ရပ်တန့်မိမှာစိုးလို့။

ကဲ.......... ပြောကြည့်မယ်
အလင်းတွေ 
တစ်ဝတစ်ပြဲ ဝါးမြိုထားတဲ့ အဲ့ဒီနေရာ
ဘာအတွက် လင်းနေတာလဲ
လမ်းတွေအတွက်တဲ့
ဒီလိုဆို
ဖြတ်သန်းလို့ သွားပါရစေ
ဆိုတော့..............
တားမြစ်နယ်မြေတဲ့။
လင်းတဲ့ အလင်းဆိုပေမယ့်
ဖြစ်နေတာက
အရောင်ဟာ အမှောင်ပါပဲလေ။

တကယ်တော့
တံဆိပ်တပ် နားလည်မှုတွေနဲ့
နားလည်ခဲ့တာ ကြာပါပြီ။
ကြာပါပြီလေ။